Brautarlækjarannáll 2026

---

Janúar

---

Kuldaboli kreisti fyrstu helgi ársins þegar við fórum öll fjögur í Brautarlæk seinni part nýársdags. Ég þurfti ekki að vinna föstudaginn og Guðrún gat unnið í fjarvinnu. Harpa var einnig í fríi og Lilja þurfti að lesa fyrir próf. Hún lét sig hafa það að lesa með okkur hin að vesenast í kringum hana. Himinn var heiður og tunglið fullt. Sólin var samt ekki sýnileg því vegna þess að núna nær hún varla að rísa upp fyrir sjóndeildarhringinn. Vindur var stilltur og frost í kringum tólf gráðurnar. Já það viðraði vel fyrir innivinnu.

Verkefni helgarinnar buðu ekki eingöngu upp á innivinnu. Verk

efnið var að smíða og setja upp hillur inn í sjónvarpshornið í stofunni. Við ætluðum ekki að kosta miklu til svo við sóttum bara mótatimbur út í timburstaflann við gáminn. Meira var nú ekki gert í framkvæmdum þessa fyrstu helgi ársins. Við áttuðum okkur á að ein gólfhitamottan hitnar ekki. Það er mottan í herbergi Imbu og Kristjáns.

Þær eru frekar kuldalegar mæðgurnar enda er napurt frost, -12 gráður.

Við röltum niður að Beinhól. Þar er kominn grunnur að húsi. Það er svo sannarlega ánægjulegt að sjá að núna er ýmislegt að gerast í endurbótum og nýbyggingum í kringum okkur. Sveinatunguhúsið er orðið glæsilegt. Háreksstaðahúsið er orðið stórgott og það á greinilega að byggja nýtt hús á Beinhólnum.

Baula, Mælifell, Baulusandur, Litla Baula, Sátudalur og Skildingafell.

Ég átti föstudagsfrí í fjórðu viku ársins og Guðrún gat unnið fjarvinnu svo við áttum þrjá daga í sveitinni.

Við erum enn að koma okkur fyrir. Fyrir sunnan biðu tvö rúm og dýnur sem við ætluðum að setja í gestaherbergið. Við hlóðum rúmunum og dýnunum í gömlu kerruna. Það var leiðinda rigning svo við reyndum að pakka farminum inn í plast. Svo illa vildi til að það var hávaðarok undir Hafnarfjallinu. Þrjátíu og fimm metrar á sekúntu og plastið rifnaði í tætlur. Þetta leit ekkert sérstaklega vel út. Plastið flagsaðist í vindinum og okkur sýndist ein dýnan á leiðinni að fjúka af. Rétt áður en við komum að Borgarnesbrúnni stöðvaði löggan för okkar og gerði athugasemdir við ljósleysið á kerrunni. Við stoppuðum síðan við ruslagáminn í Borgarnesi þar sem við skárum plastið utan af farminum og festum aftur. Svo heppilega vildi til að það var orðið þurrt svo þetta kom ekki að sök.

Guðrún reynir að stilla Dalton og Esju upp til myndatöku.

Á planinu við Brautarlæk var vaðandi drullusvað. Óskemmtilegt því við vorum með Dalton og Esju. Þeim þótti auðvitað í góðu lagi að vaða inn um allt hús eftir að hafa sökkið í drulluna og útbýja allt. Sem betur fer kólnaði aðeins svo jörð stífnaði. Himinn varð heiður og veðrið var síðan einstaklega fallegt alla helgina. Við vorum ekkert að þræla okkur út. Dunduðum okkur við ýmislegt smálegt. Við Guðrún röltuðum upp að Nátthaganum við fjárhúsin í Króki og áfram til austurs í skógræktinni þar til við vorum komin til móts við Sveinatungu. Þar snerum við við.

---